KALIBO, Aklan—Ginatutukan makaron it mga health authorities sa probinsiya it aklan ro mas pang pagpabaskog sa testing, tracing ag treatment kontra coronavirus disease ukon covid-19.
Suno kay Aklan Governor Florencio Miraflores nga posibleng sa katapusan it Hulyo hay magiging operational eon ro molecular diagnostic laboratory nga nahamtang sa Aklan Provincial Hospital.
Ginahueat eon lang sigon nanda makaron ro evaluating team halin sa Department of Health ag Research Institute for Tropical Medicine ukon RITM nga posibleng maga-abot sa martes nga adlaw.
Gindugang pa it gobernador nga ginapatigayon makaron ro online application it health declaration card sa tanan nga mga nagasueod sa probinsiya nga eubus nga makabulig sa contact tracing.
Nagapabilin man sigon nga preparado ro covid ward it provincial hospital, kung sa siin, hasta sa makaron hay nakalista ro aklan it zero casualty ag owa it local transmission.
