KALIBO, Aklan — Nadelay ro pagtau it social pension sa mga senior citizens bangud sa ginpatigayon nga national validation it Department of Social Welfare and Development (DSWD).
Tuyo kara nga eubusan nga malimpyuhan ro andang listahan kontra sa mga benepisyaryo nga may ginabaton nga pension kada buean.
Ginpaathag ni Provincial Social Welfare and Development Officer Evangeline Gallega nga raya hay matapos nga matukian it Commission on Audit ukon COA nga maabu nga mga senior citizens ro naka-avail it social pension apang may ginabaton pa nga pension halin sa SSS, GSIS ag iba pa.
Suno kana nga hasta sa makaron hay owa pa natapos ro validation rason nga posibleng indi pa maitau ro pension sa andang target nga buean it Hulyo nga magasakop sa buean it Enero hasta Hunyo, 2019.
Ginhalimbawa kara sa probinsiya it Aklan nga may una nga kapin sa 45,000 nga mga senior citizens nga beneficiaries it pension , apang ro na-validate pa eamang hay haeos 13,000.
Gindugang pa ni Gallega nga daywang beses eon lang makaron ro pag-release it pension nga nagabalor it tig-P3,000 ukon kabilugan nga P6,000 sa sueod it sang dag-on.
