Ginaeauman it Philippine Ports Authority (PPA) ro madasig nga pagkumpleto it cruise port sa Aklan nga magatao it daean sa direktang pagdungka it mga cruise ship paadto sa sikat nga isla it Boracay.
Suno kay PPA General Manager Jay Daniel Santiago, ro bag-ong Port of Alegria hay magapasugot sa mga turista nga makaabot sa isla nga inde eon kinahang-ean magsakay it maisot nga baroto.
Dugang pa kara, mataw-an man ro mga pasahero it kahigayunan nga diskubrehon ro iba pang destinasyong pang-turismo sa Aklan ag Panay Island, kaibahan eon ro Iloilo.
Suno pa kay Santiago, ro pagtukod it cruise ports sa nasyon hay importante agud maabot ro target nga 12 milyong dumueoong turista kada dag-on sa pagtapos it termino ni Pangueong Marcos sa 2028.
Kaeakip sa mga nakumpleto eon it Philippine Ports Authority hay ro Port of Jubang maeapit sa surfing destination nga Siargao Island.
Ginpasiguro dugang ni Santiago nga ro mga cruise port hay makaangkon it malimpyo, komportable ag eowas nga pasilidad para sa mga turista.
