KALIBO, Aklan—Nakamonitor ro Philippince Coast Guard sa ginaeauman nga pagdagsa it mga turista ag iba pang bakasyunista sa selebrasyon it kapistahan ni Sr. San Juan de Bautista makaron nga adlaw it Lunes sa isla it Boracay.
Angot kara, nakadeploy eon ro mga Philippine Coast Guard personnel sa mga ginakabig nga strategic areas kasunod it ginaantisipar nga bulto it mga pasahero ag mga beach goers eabi eon ag bakasyon pa makaron it mga estudyante.
Syento porsyento eon sanda nga haom sa pagmonitor ag pagbantay maghalin sa pantalan hasta sa mga baybayon sa bilog nga isla it Boracay.
May tawuhan sanda nga nakatutok sa mga watersports activities engkaso nga may mag-eontad nga aksidente ag may nakadeploy man nga personnel sa mga aktibidad nga igapatigayon angot sa kapistahan it nasambit nga santo.
Suno sa Philippine Coast Guard, uwa it paltos ro pag-aeabutan it mga turista agud nga idto selebrahon ro nasambit nga kapistahan.
Nasayuran nga haeos 108,857 ro kabilugan nga numero it mga turista nga nagbisita sa Boracay sa sueod it daywang dominggo sa buean it Hunyo.
