KALIBO, Aklan–Positibo ro naging panan-awan it pilang mangunguma sa nagtaliwan nga State of the Nation Address ukon SONA ni Presidente Ferdinand Marcos Jr.
Suno sa sangka mangunguma nga si Edgar Juanico, engkasong matabo ro mga ginpromisa ni Marcos sa sector it agrikultura hay dikara eon makaginhawa ro mga kubos nga mangunguma nga nagapas-an makaron it kalisod bangud sa mahina nga ani ag manaba nga pamaeak-eon it paeay.
Pabor nga mayad suno kana kon maideyahan it gobyerno nga mapabaskog ro ani nga paeay it mangunguma ag mahimo eamang sigon raya kon magnaba ro presyo it abono ag pestisidyo nga ginagamit sa pananom bangud nga inde eon kinahang-ean nga paigu-iguon it mga tag-iya it eanas ro andang budget.
Mas makapamayad pa sigon kon ita-o eagi it gobyerno ro bulig nga para kanda kaparehas it mga binhi ag ro pautang nga may manaba nga interest agud nga inde eon mag pangungumang ro mga mangunguma it pag-usoy it inug gastos sa andang ueomhan.
