KALIBO, Aklan—Nagapabilin gihapon nga at large ro suspek nga ginaturo nga nagbaril sa ueo it anang kainuman, pasado alas-8 gabi-i it domingo sa Brgy. Antipolo, Ibajay.
Ginkilaea ni punong barangay Alexander Nationg ro suspek nga si Guiller Seciona, sa legal nga edad samtang ro biktima nga padayun nga gina obserbahan sa sangka ospital sa banwa it Kalibo hay si Litari Ilinon Jr., 53 anyos ag parehong residente it nasambit nga lugar.
Suno kay kapitan Mationg nga nakisawsaw eamang ro suspek sa gina-istoryahan angot sa plano it pamilya it biktima nga pag bulldoze sa karsada para sa andang gina develop nga resort kun sa siin anang gin insister nga kinahangean nga mag agi sa proseso ag mag abiso sa barangay.
Matsa napikon sigon ro suspek sa pagsinabat it biktima kun sa siin ginpaandaman nana raya nga maghipos eon .
Gulping nagtindog ro suspek ag pag-agi sa likod it biktima hay gulpi nana raya nga ginbaril sa ueo nga gina alegar nga nag-eubong ro bala.
Sa pihak nga parte, ginsaysay ni kagawad Joel Gubaton nga halin sa falls hay pareho eon nga naka-inom ro daywa ag uman nga ginpadayun ro andang inuman sa sangka baeay kon sa siin natabu ro krimen.
Apela nana sa suspek nga agud nga mapaugan ro anang saeabton hay magsurender eon raya sa mga otoridad.
Gin-agtunan eon sigon nanda ro posibleng ginpanaguan kara, apang owa ro anang presensiya.
Nasayuran nga si kagawad gubaton hay sambilog sa mga nagatindog nga testigo sa krimen.
