Kalibo Aklan —- Nag-apela si Tangalan Mayor Gary Fuentes sa mga benepisyaryo it Social Amelioration Program (SAP) ag myembro it Pantawid Pamilyang Pilipino Program (4Ps) nga magpaiway anay sa ginpanupod nga food packs it andang lokal nga gobyerno .
Suno kana nga owa eon nanda gin-eakip ro mga raya agud nga maayudahan man ro ibang residente nga nagakinahangean it bulig makaron nga nagapangatubang ro nasyon sa krisis tuga it coronavirus disease (COVID-19).
Nasayuran nga ro food packs hay ginaeakipan it 20 kilos it bugas, daywang bilog nga dressed chicken , daywang ka 400 grams it pancit bihon , tig-20 nga tabletas it vitamin B+ ag vitamin C.
Suno kay Mayor Fuentes nga ro distribusyon it food packs hay ginpangunahan it mga empleyado it gobyerno kaibahan ro mga volunteers.
Agud nga mapatuman ro social distancing, ro mga residente hay kinahangean nga maghueat eamang sa sueod it andang natungdan nga baeay, kun sa siin, ginahinyu ro mga raya nga magbutang it bangko sa guwa it andang gate agud nga butangan it food packs.
Ginklaru man nana nga ro sangka food pack hay para sa sangka household ukon pamilya nga owa nakabaton it ayuda halin sa DSWD SAP ag member it 4Ps.
Ro andang gingamit sigon nga pondo para kara hay halin sa bayanihan fund it National Government .
Bangud nga owa pa it kasiguraduhan kon hin-uno matapos ro krisis hay ginatipid-tipid man sigon nanda ro pondo nga gintaeana kanda.
