Nagpangayo it pasaylo ro Traffic Transport Management Unit ukon TTMU-Kalibo sa mga tricycle operators and drivers sa banwa nga indi mapasugtan ro andang hinyu nga mataw-an sanda it lugar nga ma-parkingan sa gintaeana nga temporaryo nga terminal sa F. Quimpo St. Kalibo sa kilid it sangka mall.
Suno kay Vivien Briones, head it TTMU-Kalibo nga may sangka presidente it TODA ro nagpaeapit sa anang taeatapan, apang ginbalibaran nana ro andang hinyu bangud nga masyado sigon nga gutok ro lugar.
Ginpahayag dugang nga ro terminal hay tama eamang para sa mga public utility jeepney ukon PUJ.
Madumduman nga nagtaeana ro LGU-Kalibo it masayluhan nga lugar it mga PUJs nga nagabiyahe sa eastern side matapos nga gina-obra nga temporary relocation site ro andang dating terminal sa san Lorenzo drive it mga vendors it Kalibo public market nga naapektuhan it pagahimuon nga modernization project it tindahan.
Gina-insister it mga tricycle drivers nga mataw-an sanda it espasyo sa bag-ong terminal nga makapila.
