KALIBO, Aklan—Natigayon nga naboe-an it swab sample ro napueong ka mga indibidwal nga ginakabig nga high risk contacts it 28-anyos nga repatriated seafarer nga nauna eon nga nagpositibo sa Covid-19 ag ginasugid nga nag-eabag sa quarantine protocol sa banwa it Lezo.
Suno kay Dra. Athena Magdamit it Municipal Health Office ukon MHO-Lezo, natinguhaan nanda nga maipaidaeom sa RT-PCR test ro nasambit nga mga indibidwal nga presente eon makaron nga naka-strict home quarantine.
Apang, ginklaro kara nga sa pilang adlaw nga pag-obserba kanda hay nagapabilin sanda nga uwa it sintomas it sakit kaparehas it ubo, sipon, eagnat ukon paghigko it mabasa.
Sa pihak kara, ginklaro ni Dra. Magdamit nga uwa it kamatuoran ro mga haka-haka ng ipaidaeom sa lockdown ro andang banwa.
Suno kana, ginahimo it health authorities ro tanan nga ma-contact tracing ro nakasalamuha it pasyente nga presente makaron nga naka-isolate sa Aklan provincial hospital.
Owa sigon it rason nga ipaidaeom sa lockdown ro banwa bangud nga may guidelines man kara nga ginasundan.
Hinyo eamang kara sa publiko nga inde pag-idiscriminate ro mga taga-Lezo bangud nga bukon it tanan nga tawo hay nakasalamuha it pasyente.
Kinahang-ean suno kana nga magapadayon ro normal nga pagtrabaho ag pagpangabuhi it tanan.
Ginahimo sigon nanda ro tanan nga madumaeahan it eksakto ro sitwasyon ag ginduea man kara ro kabaeaka it mga pumueoyo kaangot sa presente nga estado it andang banwa.
