Sangka 23-anyos nga agi, nasapwan nga patay sa anang eogban

KALIBO, Aklan–Nasapwan eon lang nga nagakueob ag uwa eon it kabuhi ro sangka 23- anyos nga agi sa sueod it anang payag sa Brgy. Alimbo Baybay, Nabas.

Ginkilaea ro biktima nga si Adrian Arevalo ag residente it nasambit nga lugar.

Base sa report, ulihing nakit-an si Arevalo bandang alas-4:00 it aga-aga paghalin kara sa namatyan sa andang himata sa bahin it banwa it Ibajay.

Nauna kara, gintawag it anang pamilya si Arevalo sa payag kara nga ginaeogban apang uwa nagasabat rason nga nagdesisyon ro anang pamilya nga sudlon imaw ag dikato tumambad kanda ro eawas it biktima nga uwa eon it kabuhi.

Kumbinsido man ro pamilya nga uwa it foul play sa hinali nga kamatayon it biktima bangud sa ginareklamo kara nga pagpanakit it anang dughan.