KALIBO, Aklan— Uman nga nagpadumdom ro Department of Tourism (Dot) kaangot sa pag-book online sa mga non-compliant establishment sa Isla it Boracay.
Suno kay Tourism Sec. Bernadette Romulo-Puyat, magapaguwa it bag-ong advisory ro Inter-Agency Task Force kaangot kara bangud may iba pang mga establisyementong nagabaton it online booking apisar nga uwa pa sanda nataw-an it permit para sa October 26 Boracay re-opening.
Ginmando eon man it Dot nga dueaon ro mga online promotional materials ag punduhon ro pag-book sa mga hotel hasta sa uwa pa eubusang na-comply it mga business owners ro tanan nga mga requirements nga gintaeana para sa bag-ong Isla.
Igapatuman sigon ro “full force of law” sa sin-o mang maga-eabag sa nasambitang mandato rason nga gin-eaygayan kara ro tanan nga antes mag-book online hay tan-awon anay ro listahan it mga compliant hotels and resorts para inde maunsyami ro masadyang bakasyon.
Nasayuran nga presenteng 68 establisyemento nga may kabilugang 3,519 rooms pa eamang ro available sa uman nga pagbukas it Boracay sa masunod nga dominggo.
