Nakataeana nga maga-convene ro Regional Tripartite Wages and Productivity Board ukon RTWPB agud nga tun-an kon kinahangean eon nga uman nga makaangkon it panibag-ong dugang nga sweldo ro mga trabahador sa pribadong sektor agud nga makadungan sa pagmahae it mga nagapangunang kinahangeanon bangud sa padayun nga pagtaas it inflation sa nasyon.
Suno kay Atty. Sixto Rodriguez Jr., Director it Department of Labor and Employment ukon DOLE Region 6 ag chairperson it RTWPB nga ro nasambit nga tikang hay kasunod it mandu ni Presidente Ferdinand “Bongbong” Marcos Jr., sa ginpatigayon nga 2024 Labor Day celebration sa tanan nga mga RTWPBs nga i-review ro minimum wage rates sa andang natungdan nga mga rehiyon.
Gintaw-an it presidente ro RTWPBs it 60 diyas antes nga matapos ukon cooling-off period it presenteng Wage Order RBVI-27 nga nakataeanang maga-expire sa November 16, 2024 agud nga mag-convene.
Magakililita ro mga miyembro it RTWPB sa September 2024.
Apang antes kara hay gintalakay eon nanda makaron nga adlaw it martes sa regular meeting ro pag-review sa minimum wage rates sa setyembre ag mga datos nga kinahangeanon.
Kaibahan sa mga miyembro it RTWPB hay ro DTI, NEDA, ag daywang representante halin sa labor ag employer sectors.
Nasayuran nga ro mandu it presidente nga i-review ro minimum wage rates sa bilog nga nasyon hay kasunod it naka pending nga Senate Bill No. 2534, nga nagaproponer it P100 kada adlaw nga pagtaas sa adlawan nga minimum wage para sa pribadong sektor sa bilog nga nasyon.
Ro hagns hay pasado eon sa third and final reading sa Senado ag ginahueat eon lang ro pagpasa kara it manaba nga kapueungan it kongreso antes nga ipadaea sa taeatapan it Presidente para sa pirma.
