KALIBO, Aklan—Kapin sa 14 ka mga kumpirmadong kaso it Coronavirus Disease 2019 ukon COVID-19 ro nailista sa bilog nga probinsya it Aklan kahapon Setyembre 14, 2020 base sa ginpagguwa nga datus it Provincial Health Ofiice.
Raya hay ginakaeakipan it pilang mga nurse, encoder ag medical technologist it Aklan Provincial Hospital.
Suno kay Dr. Cornelio Cuatchon Jr. it PHO-Aklan, sa kabilugan nga 17 nga swab specimen sample, 14 sigon kara ro nagpositibo samtang tatlo mat-a ro nagnegatibo sa deadly virus.
Ro mga nasambit nga pasyente sigon ro nakaangkon it direct contact sa sangka laboratory staff it ospital nga nauna eon nga nagpositibo sa sakit ag residente it Brgy. Bakhaw Norte, Kalibo.
Makarun nga adlaw suno kana hay nakataeana nga ipadaea sa Western Visayas Medical Center (WVMC) ro kapin sa 209 nga swab sample it mga indibidwal nga high risk contact it mga Covid-19 patient.
Ginpahayag dugang nga temporaryong ginsarado ro molecular laboratory it probinsya nga nahamtang sa Aklan Provincial Hospital bangud sa pagpositibo it pilang medical staff.
Indi pa sigon matumod kung siin nabuoe it mga pasyente ro virus apang mabahoe sigon ro risgo it mga health worker nga makaangkon it COVID-19 bangud sa andang trabaho.
Engkaso sigon nga makabatyag it sintomas hay mas mayad nga indi eon lang anay magsueod sa trabaho ag sa baylo hay mag-isolate eon lang.
Sa pihak kara, nagapadayun pa sigon ro andang ginahimo nga contact tracing agud matumod ro mga posibleng nakasalamuha it mga confirmed cases.
Sa makarun hay nakalista eon it 59 nga kumpirmadong kaso it COVID-19 ro probinsya kung siin 22 kara ro nagapabilin nga active cases samtang 35 mat-a ro naka-recover matapos ro pagbueong ag quarantine procedure ag daywa ro nailistang namatay.
Samtang, nag-apela si Dr. Cuatchon it kooperasyon sa publiko nga padayun nga magsunod sa mga minimum health protocols it Department of Health kapareho it masami nga pag-sanitize ukon paghugas it alima, pagsuksok it face mask ag face shield sa kada magguwa ag striktong implementasyon it physical distancing agud nga maproteksyonan ro kaugalingon, pamilya ag ro bilog nga kumunidad kamana man nga pabaskugon ro resistensya sa tunga it padayun nga paeag it pandemya.
