KALIBO, Aklan—Naga-abot sa masobra P70,000 ro kantidad it danyos sa pagkasunog it sangka boarding house pasado alas-11:20 gabi-i it biyernes, abril 4 sa Bayanihan Road Brgy. Andagao, Kalibo .
Suno kay FO1 Janryl Magno, imbestigador it Bureau of Fire Protection ukon BFP-Kalibo nga base sa pahayag it mga nakasaksi nga nag-umpisa ro sunog sa may kusina nga portion it baeay nga ginapanag-iyahan ni Zenaida Raco nga naga-istar makaron sa Brgy. Camaligan, Batan.
Igbata man sigon it tag-ana ro naga-okupa sa daywang kwarto it boarding house.
Madasig suno kana nga nagkalhit ro kaeayo bangud nga himo sa light materials ro kusina.
Ginpahayag dugang nga matapos nga makaangkon it power supply kasunod it natabu nga brownout hay nakabati ro mga naga-istar sa baeay nga may naga-einagasag ukon naga-spark ag sa andang pagtan-aw hay nagakaeayo eon sa portion it andang kusina .
Suno kay FO1 Magno nga nagapadayun pa ro andang imbestigasyon sa rason it sunog ag owa man nanda ginaduea nga posibleng short circuit ro ginhalinan it kaeayo .
Maeayo man sigon ro anggulo nga halin sa LPG tank ro sunog bangud nga owa it nabatian nga pagsabog nga natabu.
