Gina-eauman nga maabot sa kapin sa P5.268 trillion ro full-year budget it magasueod nga administrasyon si Presumptive President Ferdinand “Bongbong” Marcos Jr. sa 2023.
Gin-anunsiyo ni Department of Budget and Management (DBM) officer-in-charge Tina Rose Marie Canda ro ginaduso nga national budget sa sangka virtual press briefing.
Kasunod eon man raya sa 181st meeting it inter-agency Development Budget Coordination Committee (DBCC) nga ginakaeakipan it mga economic managers it nasyon.
Ro ginaduso nga budget hay katumbas it 22.1 percent nga gross domestic product it nasyon suno kay Canda.
Ro budget ceiling nga aprubado it economic managers hay mas mataas kumpara sa P5.242-trillion nga gin-aprubahan it mga economic team ku nagtaliwan nga Desiyembre 2021.
Ro DBCC hay ginakaeakipan it mga sekretaryo it Socioeconomic Planning, Finance (DOF), Budget and Management (DBM) kamana man it Bangko Sentral ng Pilipinas (BSP).
Suno kay Canda, ro economic team, ro desisyon it mga economic managers nga maka-angkot it gP5.268-trillion cap para sa 2023 national budget hay bangud eon man sa mataas nga projected revenue collections sa masunod nga dag-on.
Samtang, sandig sa huna-huna it mga economic managers ro disbursements sa masunod nga dag-on hay posibleng maabot sa kapin P5.086 trillion ukon katumbas it 21.3 percent it GDP.
Nagapabilin man ro target it DBCC nga fiscal deficit sa 6.1 percent it ekonomiya sa 2023.
Ku nagtaliwan nga Lunes, ginpahayag ni Marcos nga ginatan-aw ro national budget para sa 2023 nga puwedi nga bue-a it pondo para sa economic stimulus measure bangud sa padayon nga ginapangatubang nga Coronavirus disease 2019 (COVID-19) pandemic.
