KALIBO, Aklan–Excited eon nga uman nga magbalik sa pagsadsad ag magperform ro Tribu Bukid Tigayon para sa week-long celebration it Kalibo Sr. Sto. Niño Ati-atihan Festival 2023.
Suno kay Rincy Martinez, organizer it tribu nga halin pa ko buean it Oktobre kat nag-umpisa sanda sa pagdesiyo ag pag-ubra it andang costume.
Ro andang grupo nga ginakaeakipan it 46 ka mga damcer ag 40 nga drummer hay magapasakop sa small tribal category.
Indi sigon nanda maitago ro sobrang excitement matapos ro daywang dag-on nga pagpaiway sa selebrasyon bangud sa pagpanaeasa it pandemya.
Dugang pa ni Martinez nga makapilang beses eon sanda nga nagkampeon sa small ag big tribal category.
Ro Tribu Bukid Tigayon hay gintukod it anang ama nga si Jesus Martinez masobra 25 anyos eon ro nagtaliwan.
Matueopangdan nga naga-abot sa 60 hasta 70 ka mga grupo halin sa nagkaeain-eain nga kategorya ro magapasakop sa kabilugan it selebrasyon.
