KALIBO, Aklan—Waeo nga banwa ro nagpasakop sa Aklan Higante Contest nga ginpatigayon, adlaw it Huwebes.
Halin sa 11 nga mga entries ko nagtaliwan nga dag-on, waeo eon lang nga banwa ro nagpadaea it andang natungdan nga pinakamanami nga higante para sa Kalibo Ati-Atihan Festival.
Kumpara ko nagtaliwan nga mga dinag-on nga mga higanteng pigura it mga ati ro ginparada, mga higanteng bagay ro gin-martsa sa contest.
Raya hay nakabase sa andang tema makaron nga dag-on nga “Panubli-on nga Manggad It Akean, Dungod it Bag-ong Henerasyon” nga nagasuporta sa tangible cultural properties it kada banwa sa Aklan.
Suno sa provincial tourism office nga tuyo it higante contest it provincial government it Aklan nga i-promote ro nagkaeain-eain nga mga produkto ag iba pang cultural products nga ginapabugae it sangka banwa.
Ro mga ‘Higante,’ hay may kataason nga kapin sa 10 feet ag eapad nga 6 feet, nga nakasakay sa sangka platform ukon kariton.
Ro mga nagpasakop hay ro mga banwa it Libacao, Buruanga, New Washington, Banga, Kalibo, Nabas, Malinao ag Ibajay.
Ro mga LGUs nga owa it entries hay nagpasakop sa parada.
Nagtililipon ro mga nagpasakop sa atubang it ABL Sports Complex sa Capitol Site Kalibo para sa pre-judging it mga entry ag nag-umpisa ro parada bandang ala-1 it hapon.
Sa pihak nga parte, ro kampeon hay nag-uli it P200,000, ro 2nd place hay P150,000, ag ro 3rd place hay P120,000.
Ro 4th place hay nakabo-oe it P100,000, ag ro ika-limang puwesto hay P80,000.
Ro mga uwa magdaog hay nagbaton man it P60,000 bilang consolation prize.
