KALIBO, Aklan—Ginakabig eon makaron nga persons under monitoring ukon PUM ro daywang residente it Barangay Badiangan, Banga nga gin-rescue gamit ro ambulansiya sa boundary it Passi, Iloilo ag Dumarao, Capiz kaibahan ro tatlong iba pa nga naigpit sa ginpatuman nga enhanced community quarantine.
Suno kay Badiangan barangay captain Ledwino Roselo nga gin-abisuhan sanda it andang DILG officer nga bantayan ag i-monitor ro pag-abot it daywang trabahador it sangka construction company halin sa Janiauy, Iloilo matapos nga ginsuspinde ro andang trabaho.
Ginasugid nga halin sa Iloilo hay ginhatud ro limang trabahador nga puro tumandok it Banga sa nasambit nga lugar sakay it pick-up nga service it andang kompaniya.
Apang bangud nga owa it masakyan hay nagpangayo sanda it bulig sa mga opisyal it Banga agud nga masueang bangud sa gaoy ag gutom nga naexperiensiyahan.
Mag-eowas kara, pilit sanda nga nag-uli bangud nga nagakabangat sa andang natungdan nga mga pamilya.
Gindugang pa ni kapitan Roselo nga hugut nanda nga ginabantayan ro nasambit nga mga kasimaryo nga naka home quarantine ag owa man it sintomas nga nabatyagan.
